Էկոտուրիզմի զարգացումը Դսեղում. բացվել են երեք զբոսաշրջային հյուրատներ

 

<Ծովեր> լիճ

Հունիսի 28-ին Եվրոպական միության և  Ավստրիական զարգացման համագործակցության կողմից ֆինանսավորվող, ինչպես նաև համաշխարհային բանկի IUCN-ի  և WWF-ի կողմից իրականացվող «Անտառային օրենսդրության կիրարկման և Անտառային ոլորտի կառավարման բարելավում Եվրոպական հարևանության քաղաքականության արևելյան երկրներում և Ռուսաստանում» ծրագրի շրջանակներում, WWF-ի հայաստանյան գրասենյակը Դսեղ համայնքում կազմակերպեց ծրագրերի ավարտական և մաքրման աշխատանքների կազմակերպման հետ կապված միջոցառումներ։

Միջոցառմանը մասնակցեցին մարզպետարանների, միջազգային կազմակերպությունների, ԶԼՄ-ների  ներկայացուցիչներ:

Դսեղում բացված հյուրատներից մեկը

Բնության համաշխարհային հիմնադրամի հայաստանյան մասնաճյուղի տնօրեն Կարեն Մանվելյանի խոսքերով` ծրագրի իրականացման համար  ընտրվել  է Դսեղը, քանի որ  գեղեցիկ լինելուց բացի այն  հայոց մեծն  բանաստեղծ Հովհաննես Թումանյանի ծննդավայրն է:

Կարեն Մանվելյան

Կ. Մանվելյանն ասաց, որ  ծրագրի նպատակն է զարգացնել բնության տուրիզմը: Այդ նպատակով  ծրագրի շրջանակներում Դսեղ գյուղում արդեն բացվել են  երեք  զբոսաշրջային  հյուրատներ,  տեղադրվել են  տեղեկատվական վահանակներ, ինչպես նաև  <Ծովեր>  լճի հարևանությամբ  <Ծովեր> հանգստի   գոտում  ստեղծվել են էկոտուրիզմի զարգացման համար անհրաժեշտ ենթակառուցվածքներ, որտեղ զբոսաշրջիկներին կտրամադրվեն քնապարկեր, հեծանիվներ, նավակներ և այլ անհրաժեշտ պարագաներ:

Կ. Մանվելյանը տեղեկացրեց նաև, որ մեկ գիշեր հյուրատնում անցկացնելու համար պետք է  վճարել 5000-7000 դրամ, որի մեջ մտնում է նախաճաշը:

Ծրագրի համակարգող Գեռա Ոսկանյան

Ծրագրի համակարգող Գեռա  Ոսկանյանի խոսքերով` հանգստյան գոտու ստեղծումը    կարող է  ծառայել որպես  այլընտրանքային եկամտի աղբյուր  բնակիչների  և համայնքի համար: <Ծրագրի նպատակն է այլընտրանքային եկամտի աղբյուր ստեղծել էկոտուրիզմի զարգացման միջոցով և նվազեցնել համայնքների կողմից  անտառահատման գործընթացը>,- ասաց Գեռա  Ոսկանյանը:

Հավելենք, որ հունիսի 30-ին Կողբ գյուղից  10 կմ հեռավորության վրա գտնվող  Զիկատար  արգելավայրի  <Զիկատար> ուսումնական կենտորնում տեղի կունենա  մյուս միջոցառումը, որով և կավարտվի ծրագրի առաջին փուլը: Կողբում  ծրագրի իրականացման  արդյունքում ստեղծվել են  մրգերի և  հատապտուղների  հավաքման  կետ և   այցելուների կենտրոն:

econews.am